這天戲肉之一第七場1200米一級賽百週年紀念短途盃，上屆盟主「幸福指數」同蘇銘倫的「大運財」今場鬥熱，結果這兩匹兩倍馬，跑落統統輸給一匹心律不正常馬，此乃蘇保羅馬房由潘頓策騎的上季最佳短途馬「友瑩格」，「友瑩格」上仗季內初出10月25日爭精英碗，因心律不正常及氣管多血大熱包尾，之後連國際賽都被逼放棄，這天復出雖然直路極不規矩，但卻可彈甩贏個半身位，仍算清脆俐落。
「友瑩格」健康陰霾下不受馬迷睇好，8.5倍開跑，不過陣上走勢遠比預期好，直路初冇騎已自動湧上拍實「幸福指數」，潘頓一直撳韁好老定，「友瑩格」好快透出直奔終點捧盃，組合獨贏3揀1開A2派33元正，組合獨贏勝出練馬師開B2派76元。「友瑩格」服役生涯增至十捷，其中四場都係國際或本地一級賽，總獎金近3千500萬，香港當代短途王地位非常穩固。而蘇保羅馬房連同第三場勝出「魅力知心」在內，亦告梅開二度。
今場直路尾所見，「友瑩格」超越內側雷神之「幸福指數」時，曾兩度內閃挨擦或碰撞「幸福指數」，令其勒避失位，「幸福指數」因此騎落唔多，拉士仲畀「大運財」過埋跌落第三，「大運財」得亞軍。雷神衝線時口中似乎念念有詞，有啲唔服氣咁款，賽後佢果然提出抗議「友瑩格」頭馬資格，不過「友瑩格」其實點跑都贏，抗議好快就被競賽小組駁回，賽果不變。
今場殿軍由冷門「恩格斯」取得，四重彩每注派六千六百幾，而這天三T有人中正獎，每注派21.7萬多元。