有關開年吉日吉時一事，讀者來電郵問及，是否在年初三在家開電腦，睇公司電郵，亦算係開工？因佢間公司按假期完結後第一日，即年初四就要返工，唔可以唔跟從。年初三做番一兩件公事，理論上亦算係開工嘅。呢日在上海總會與一間銀行嘅高層吃飯，高層嘅下屬亦在座，大家只係聯誼，不談公事，但食食吓龍鬚桂魚之時，銀行市務總監忍唔住要問：「我想年初三吉時開工，又唔想返銀行，點好？」高層話：「開住黑莓嚟睇電郵啦！」但跟住又話：「我日日都睇住黑莓，唔算開工啫。」講咗一輪，卒之諗到一條好計，高層對市務總監講：「嗱，你度一個簡單市場推廣計劃出嚟，用黑莓傳俾我修訂、審批，我第一時間回覆你，仲唔係做公事？咁咪當大家在年初三吉日吉時開工囉，兼足不出戶㖭！」
難得老闆與下屬充份合作，咁就輕而易舉解決咗年初三假期開工嘅問題，有需要者，大可以仿效之。
年晚食飯，並非講生意場合，講吓商場形勢則無妨。高層話以往到咗農曆年前兩三個星期，食飯食到暈，因有不少客戶包括國企、民企、本港中小企等客戶排隊請吃年夜飯及春茗，銀行亦要回請一啲大客；但今年就有啲改變，國企請吃飯次數大幅度降低，因要刻意克己，避免違規，避免俾中紀委追查也。過往內地企業請食飯，一擲萬金，面不改容，兩千蚊一隻凍蟹照食可也，但現時國企內部有限制，吃飯請客最高不得超過每人五百大元，即一圍六千，去鏞記都唔得啦，索性唔請。銀行方面即使要請食靚嘢貴嘢，國企高管亦唔敢出席，於是銀行樂得清閒，唯一受害者當然係啲高級食肆及會所啦。至於本港中小企，今年亦會縮皮，生意前景不明朗之際，慳啲為妙。銀行界消息及外國通訊社消息都話中央密令本港嘅中資銀行不得隨便拆借人民幣，換句話講，要抽緊人民幣頭寸，唔借俾外資行，變相挾高人民幣同業拆息利率以捍衞人民幣匯率，令意圖沽空人民幣嘅「外來炒家」吃高利率苦頭。呢招當然會短期有效，但從A股市場嚟睇，「沽空中國者」多數不是外國勢力，而是土豪大鱷，百分百自己同胞，中央有意無意之間誤導市場，從自己面子角度去諗對策，往往枉費彈藥，股市越救越跌，匯市看來亦然。