運程書呢期大賣，皆因唔少人想知來年運程係點，以便趨吉避凶！公民黨新界東立法會補選候選人「岳少」楊岳橋就無師自通，抽到7號參選號碼嘅佢，大膽化身「鋼板神算楊七命」，拍咗條短片放上網，幫大家算一算689治下嘅猴年，足金膠喉有冇奶油？
注意拖篋交通「意外」
到底今年有乜要注意？楊七命提醒大家，必須注意交通意外，小心拖篋「車親腳」。又係嘅，水貨客問題未解決，消災解難方法當然係加強執法，但佢叫大家唔使為此攝太歲，增設陸路離境稅就得嘞！
把口唔收嘅人，都要聽聽楊大師意見，要小心嘞，皆因一地兩檢下或會「送猴入狼口」。點解呢？內地人員可以喺香港執法喎，到時仲唔為所欲為？而689特首，會否唔會保護港人呢？呢一點怕且唔使楊七命出動羅庚，大家都心中有數啩！
想睇吓楊七命有幾堅，可以上佢fb睇片；而噚日喺大圍又有造勢活動嘅楊岳橋，則扮成馬騮出動；而喺「楊七命」外，原來佢最近仲多咗個「楊七公」花名，當然，個「七」字要讀得好小心啦！。
唔知同楊岳橋一齊參加補選嘅方國珊、黃成智、梁天琦、周浩鼎、梁思豪同劉志成，又有冇逢凶化吉嘅心得？
李八方
mailto:[email protected]