騎士「三巨頭」之一嘅勒邦占士（LeBron James），無論去到邊都係眾人嘅焦點所在，而佢喺上周六迎戰馬刺嘅常規賽入面，就因為着錯波褲而更加引人注目。不過呢個小插曲完全冇影響到佢嘅表現，最後都幫球隊以117:103贏波。
騎士今場着復古版波衫迎戰馬刺，不過睇真啲，原來全隊得占士一個人着咗普通版嘅黃色波褲，褲嘅側邊係冇紅白間條（小圖）。占士喺開波嗰陣，完全唔發現自己同隊友有乜分別，直到有人喺第一節嘅暫停時話佢知，佢先即刻去更衣室換番。不過占士冇因為咁而影響表現，仲射入全場最高嘅29分；加上「三巨頭」嘅K艾榮（Kyrie Irving）同路夫（Kevin Love）都狀態大勇，兩人同時拎到21分，助騎士擊敗馬刺。
「下次會檢查清楚先」
不過占士都因為着錯褲而覺得好無奈，佢喺賽後話：「我真係發現唔到自己着錯褲。件波衫係黃色，條波褲又係黃色，我冇諗咁多就着咗上身。我知道球隊有幾款唔同嘅黃色波衫，下次我會檢查清楚先着上身！」至於點解占士會着錯褲？據聞係因為騎士負責裝備嘅職員一時大意，唔小心畀咗條錯嘅褲佢。