喺深水埗起家嘅民協馮檢基，去年區議會選舉被工聯會拔筍成功，失落麗閣選區議席。阿基喺麗安邨嘅辦事處經過11年零10個月服務，噚日正式關門大吉，據佢了解，勝選嘅工聯會小花陳穎欣已經申請咗佢呢個辦事處。
阿基噚日喺邨內搞「社區情，回顧感謝會」，擺檔寫揮春、剪紙、派自己著作等，一班義工自製大型心意卡註明「等着你回來」、「我捨不得你」，有人仲忍唔住哽咽，一向眼淺嘅阿基卻用笑容告別街坊，忍住冇流馬尿。佢同街坊講，為咗令民協有更多議席，嚟緊唔會再喺九西直選，「我唔只要離開麗閣，仲係離開深水埗」，但對街坊承諾不變，原有辦事處電話會保留，繼續接觸街坊。阿基自言下屆九東、新東、新西直選都會考慮，冀農曆年後拍板。