上年董事盃賽日蘇保羅馬房起孖，而上周日經典一哩賽日，佢都有兩Win，這天蘇保羅在第三場四班草地1200米，以「魅力知心」先下一城，為可能再次起孖揭開序幕。
「魅力知心」前仗首次用雷神即大熱開齋，上仗再用雷神進一步熱到1.5倍，跑落卻只得第五，輸到馬迷嗌救命，今次人馬繼續攜手，結果以3.5倍次熱身份於同程同班重開勝門，不枉女馬主鄧詠琪早兩日冒寒落場睇操咁積極，組合獨贏開A2派21.5元。
上次日賽天寒地凍，雷神罕有地捧蛋返屋企，這天氣溫回升，雷神話咁快憑徐廐「財歡笑」、蘇廐「魅力知心」包辦第二口孖寶，率先於騎師王透出。
反觀潘頓這天就畀巴西騎師食住，繼頭場「精益旅程」影相輸畀蘇兆輝座騎「金威利」後，今場佢以首次上陣的身價550萬初出香港拍賣馬「索先生」出擊，又不敵雷神的「魅力知心」再做二奶。三、四名分別係布文座騎「銀城福星」及配郭能初出的「威五」，呢條洋將四重彩派二萬四千幾。
「魅力知心」馬主鄧詠琪賽後表示，愛駒上仗輸得唔抵，今仗成功補中，與家人朋友一起拉頭馬分享喜悅，十分高興。