股市一跌再跌，形勢有種山雨欲來嘅感覺。經濟係咪轉差，借用黃子華嘅經濟學理論，進行實地目測。話說喺市道差，的士司機才講聲：「多謝！」過去一個月，消失嘅銅鑼灣過海的士車龍重現，平日同周末嘅的士站都泊咗最少三、四架的士，同年半前差好遠。有日搭車都問問的士司機大佬點睇，佢覺得香港市況係差咗，客人截車冇以前咁爽手。
民間消費活動同經濟息息相關，市況飄搖，大家寧願多啲現金揸手，遠在美國嘅民眾亦一樣。美股首月表現創7年最差，打擊民眾消費信心。現時美國家庭持有股票等資產少過兩成，有四成半家庭完全無參與股市投資。
過去年半以來，國際油價大跌，令燃油價格下調。有調查指美國民眾燃油費用開支去年全年節省近三成，估計每人慳到659美元（約5,100港元）。崇尚先使未來錢消費文化嘅美國人都想儲錢為先，上季全國儲蓄率按年增5.4%，為3年最高。民眾勒緊荷包對美國經濟弊多於利，最怕拖慢美國通脹回升，令儲局想再加息又遇阻力。其實美國開始加息周期以來，強美元亦帶來隱憂。美元今年內累計升值1.4%，儲局官員擔心美元續強，國家經濟增長將受影響。當局預測每美元升值一成，美國中長期經濟增長將被拖低1.5個百分點。
Captain Cool
本欄逢周一刊出