熊黛林（Lynn）同男友郭可頌拍拖短短年半時間，話咁快就融入郭家，舊年聖誕節仲陪男友一家人飛沖繩慶祝。Lynn同男友戀情邁向「直路」，早排佢喺微博晒命搶到花球，又話自己ready結婚，睇嚟Lynn恨做郭太恨到出口！
Lynn做唔做得成猴年新娘就未知，不過有讀者透過本報「爆相爆片」，指Lynn前晚飛到泰國拜四面佛。相中見到着住間條連身裙嘅Lynn，雙膝跪拜燒香，誠心禱告念念有詞，之後再喺廟入面買祭品供奉，成個儀式就只有佢一個人。不過Lynn着住平底鞋都高過其他人，話咁快就俾人認出，唔少人仲拎起手機同佢影相，搞到Lynn黑面發𤷪𤺧叫人：「不要拍，不要拍！」最後佢喺廟中逗留45分鐘先離開。
沖喜擋太歲
其實Lynn屬猴今年36歲，喺本命年犯太歲，可以用「紅事」沖喜，就連Lynn都開晒口希望趕得切今年辦喜事，今次佢拜四面佛，睇怕都係想知自己幾時嫁杏有期囉！
撰文：馮仁昭