男神王宗堯前日變身Uber星級司機，四出主動接客，原來其中一位有幸獲男神接送嘅女士，竟然係「蔡英文」！乜蔡英文嚟咗香港？當然唔係啦，八方講緊嘅係民主黨嘅黎熙琳，呢位喺區選僅以3票之差落敗嘅黑妹，真係好似少女版蔡英文㗎！
黎熙琳喺fb分享同男神相遇嘅「浪漫史」。佢話前日call Uber，竟然call中王宗堯，大讚男神好健談，上車後即刻問佢飲啲乜，包括有柑桔，結果佢揀咗柑桔檸蜜，齋聽已經覺得甜到漏！
同男神喺車廂內有乜悄悄話？原來有講起蔡英文當選總統，佢引述男神話呀，覺得蔡英文都幾似葉晴㗎，大家都好期待《選戰》拍續集。
男神將佢安全送到美孚後，仲親筆寫咗「路路亨通」幾粒字畀佢，獲贈墨寶嘅黎熙琳當然冧到暈。