上周喺日本伊豆亞錦賽成為港隊大贏家嘅張敬樂（右），噚日返到香港，將自己喺亞錦賽攞嘅三金兩銀上載fb，同大家分享。一落機，乖乖仔仲第一時間約媽咪喺茶餐廳食tea，順道預祝一吓今個月八號自己嘅25歲生日！阿樂嘅下一個比賽係下月初嘅倫敦世界場地單車錦標賽，仲會一口氣參加四個賽項，包括記分賽、捕捉賽、麥迪遜賽同四公里個人追逐賽，希望一嘗代表冠軍嘅「彩虹戰衣」滋味。