蘇偉賢馬房的「急急腳」周日(31日)爭第六場四班1400米，排最差嘅14檔起步，呢匹馬連同今仗共5戰，4次抽13或14檔，認真黑仔。講到此事時，蘇偉賢幽默咁話「我都慣晒啦！」
事實上，今季確有不少賢廐馬成日抽大外檔，好似「福爾摩斯」近5次上陣4次排9至11檔，不過其中仍有一仗可拼入亞軍，可見蘇偉賢唔會因為戰馬排檔形勢欠佳，而縮沙唔搏。
蘇偉賢又指出，暫無賽程嘅新勝馬「恆駿寶駒」與「急急腳」，差不多同一時間運港，兩駒目前仍很ＢＢ，仲有好多進步空間。「急急腳」今仗初次綁脷跑，目的是希望馬兒集中精神。
「急急腳」排劣檔，但今期賢廐另一戰馬，第五場四班1600米的「神威福將」卻喜抽2檔。蘇偉賢指自己很早已卜定莫雷拉，為此駒爭三連捷。他道出雷神接座騎的風格：「我搵雷神騎馬，會一早搵他，雷神通常比較遲回覆係咪會騎，因為佢有好多馬可以揀。但雷神有樣好，就係一旦答應肯騎，即使之後再有其他練馬師，向佢提供更惡的馬，雷神都不會受誘惑而動搖，會履行當初承諾，不會臨排位才推庄。」
「神威福將」日前由雷神試閘，撳住輕鬆返嚟，充滿生氣，蘇偉賢話隻馬復課狀態保持勇銳，而頭號對手是蔡廐「精算博奕」喎！