【本報訊】他的歷程既典型也是非典型。典型在每隔幾年就得大遷徙，住過劏房、唐樓、村屋、工廈，土地問題他是專家。非典型在他是狀元，會考7A2B、高考3A。預科半班讀醫，偏考進港大讀建築，吃不消千篇一律的樓盤設計，轉讀中大藝術系。任性到不顧現實，還不是富二代？「細個住唐樓，對下兩個妹，我長期做廳長㗎喎」。男人四十，寫下半自傳《賣畫維生》，分享非典型藝術之路，他是石家豪。
記者：呂麗嬋
「預科讀生物班，一班30人，半班讀醫，我喺同學之中，都算傳奇人物」。人稱豪爺的石家豪，自嘲似的說。外形像個忠厚中學老師多過狂放藝術家，這個豪爺，說話溫文、愛下廚，太太是初戀情人。他的反叛，都在骨子裏。「有個預科同學，會考8A，同我一樣愛畫畫，佢最終讀咗病理學，話好羨慕我以興趣為業」。走上不同的路，但在香港，應該更多人羨慕埋首實驗室的醫生。創作嘛，公餘興趣就好，條數就算數學不用考A都識計。
自娛手寫受歡迎獲加印
「喺香港，藝術家都有正職，最多係教書，有畫家係工廠廠長，嶺南派畫家陳勉良，最出名係喺電視台扮道友」。在石家豪的工作室，就有幅畫開宗明義解構港產藝術家的「錢途」。「講呢啲，喺我哋個圈子，幾顛覆，但藝術就係要突破傳統」。他大笑。「新高中多咗視藝科，成日俾學生問我全職創作，喺香港點生存，問得多，不如畫出嚟」。2年前，他乾脆自資出版書仔《1984》，為創作歷程來個小結，也回顧陪伴他成長的80年代。
「《1984》，除咗係本名著嘅書名，呢一年，仲係草擬中英聯合聲明，政治上社會上好多變化的一年」。那一年，他剛升中，移民潮、流行文化的興起，由《霧之戀》到《風繼續吹》，玩票自娛手寫書，寫下中學生的回憶，放在獨立書局寄賣，竟然受歡迎到要加印，有出版社主動接洽，自傳式圖文書《賣畫維生》由是誕生。大抵，混沌迷失，都是成長必經階段吧？
領悟三仔四師外不同人生
「最開心係睇嘅好多都係80、90後」。有些感覺，超越時間。80年代，三仔主義（車仔、屋仔、老婆仔），還有四師（律師、建築師、醫師、會計師），時至今日，仍是不少人的理想人生。在他就讀的中學，半班同學讀醫，他愛美術，就讀建築。「以為可以畫嘢，算係實用美術」。現實是對着蘋果橙畫畫，與讀建築是兩碼子事。「喺香港，建築師大都為發展商服務，填格仔，建千篇一律的樓盤，諗計盡用地積比率」。1989年，他作了人生最任性的抉擇：向港大申請退學。
「好多人叫我讀完3年，攞埋學位先，但我覺得，既然唔適合，點解要浪費時間？」報讀中大藝術系，先斬後奏，「好在我向來成績好，小學開始爸媽已冇乜點理我，加上佢哋讀書唔多，對於我轉系，阿媽只係點吓頭，冇出聲」。建築師夢未開花已凋零，中大4年卻教他看到三仔四師以外不同的人生，「除咗藝術史，仲學油畫、國畫同雕塑，學習不同類型的藝術形式」。
「嗰時開始認識工筆畫，越研究越有興趣」。利用古老材料創作現代題材，成了他的獨有風格。只是，全職創作的路，還是很遙遠。94年畢業，全系20人，四成人教書、三成人做藝術行政工作，剩下三成，就流失到各行各業，他是其中之一。「嗰時喺份報紙做校園版編輯，讀藝術的人都有一套語言，好小圈子，嗰一年好重要，令我學識要用最淺易的方法，將一件事講得有趣」。
「冇一條藝術家專業之路」
爸爸做藥材舖小生意，身為長子也得養家，翌年轉到藝術館做研究助理，首次遇見全職藝術家。「佢係一位台灣畫家，住得偏遠，慳食慳着」。研究助理月薪萬七，只一年就儲了10萬。「同朋友喺十八鄉合租村屋做工作室，目標係全時間創作一年」。畫畫、寫計畫書，自由身不忘日出而作，短時間已累積不少作品。直至有次畫展，一個外國人指着他的畫問價，「從冇諗過作品竟然賣到錢！」偶遇知音人，獨立創作之路，誤打誤撞逐漸上了軌道，今時今日他的作品成為多個藝術館的藏品，獲邀參展的國家遍歐美亞洲。「從無一條所謂藝術家專業之路，都係靠摸索出嚟」。仍習慣街市收檔前買10蚊3斤平菜心、35歲打後才開始微有積蓄的豪爺如是說。