今年最凍嚴寒之日在家吃晚飯，在住所lobby見到鄰座大學生C穿着短褲，披一件羽絨短褸，問佢：「你唔怕凍咩？你啲同學話要求沈校長停課喎；睇你個樣咁唔怕凍，你會唔會支持停課呀？」學生C大笑：「呢班人想上莊，搞競選，想出位啫，中大咁鬼凍，停課喎，住在山頂宿舍唔出房呀？更加凍啲㖭，打機都怕手指僵硬，打唔到呀！」學生C去過外國做交換生，經歷過零下廿幾度落雪嘅天氣，叫做有視野，有唔同諗法，經常在本土貪舒服，怕出外之大學生，好易成為陶傑筆下嘅「冬亞病夫」，如果中大在零度以上嘅天氣，竟然停課嘅話，一定成為國際笑柄。
校園不時有大學生跳樓自殺事件，令人心有戚戚然，讀書啫，讀唔成還有其他事好做，考唔到A，考個B、C又如何？駛乜覺得學業有壓力吖。壓力係自己俾自己嘅，或者係來自望子成龍嘅父母，大家睇開啲，就會少啲壓力。
呢日有F董事請食飯，講起讀書，左丁山問佢有冇壓力？F董事話：「有呀，我留學美國中部一間大學，初去第一年冬天戶外凍到手腳騰騰震，嚇親，幾乎足不出戶，俾同學懷疑我有自閉症，笑我、鬧我，令我精神好有壓力，要到冬天過後，自己適應咗嘞，第二年冬天就跟同學去學習滑雪，冇晒壓力；然後讀書有壓力，第一年讀化學，嘩，深到嗌救命，讀到頭爆都係攞個C，成日去媾女嘅台灣同學輕輕鬆鬆就攞個A，自己直情想死，但教授叫我放鬆啲，唔好夾硬嚟，叫我轉系，於是轉讀工程，原來又係好深嘅，有大壓力，於是轉去讀商科，哈，原來商科可以吹水，好易讀，我都有時間跟台灣同學去搵女仔開P。留學四年愈讀愈過癮，要害係自己知自己事，做唔成化學家、工程師，還可以有水泡科──Business，你話讀唔掂化學就得到個抑鬱症，會幾唔抵呢！」咁又係，F董事回港後，先打工後創業，依家已係公司老闆，商會董事，一啲壓力都冇。F董事又加多一句：「其實同名牌MIT比較，香港啲大學生已經相當輕鬆，美國大學工學院每堂上五十分鐘，每學期有十五星期，香港就每學期13周，每堂上45分鐘，讀4年等於在美國讀3年，美國名牌大學嘅required reading又多到不得了，邊有香港大學生咁hea㗎！」係囉，記得姨甥女初到芝加哥大學，讀通識科嘅西方古典名著已經讀到冇時間上床睡覺，猛嗌辛苦。一啲人投訴香港讀書辛苦，壓力太大，咁就唔好期望兒女考入美國長春藤大學咯。