曾經，做教練嘅工作係教波，當然家陣都係，但亦唔係嘞，作為球隊話事人，要應付三班客仔，一係球員，二係球迷，三係傳媒朋友。
教波嘅大佬，教好隊波就得啦，係嘅你冇錯，不過呢一環實在係基本要求，你畀心機帶好隊波，隊波有成績的話當然可以令你順風順水，塊面黑過關公都得，不過有幾多教頭可以確保自己成世隊波都好成績呢？當然係零啦。
人辦周圍都有，雲高爾今時今日坐唔安企唔落，就係因為keep住用我會打好呢份工嘅作風去教波，表面你幾勤力攞住幾重嘅公事包抄低幾多notes都好，但係見到班下屬踢得唔好即刻藐嘴，轉頭見隊波偷雞贏波又開心到合唔埋嘴，仲要周圍同記者開火，咁鬼官員嘅嘴臉，今時今日唔興㗎喇。波無百日贏，當你低潮嘅時候，傳媒同球迷嘅無形力量隨時可以救你一命，但亦可以送你快啲去死喎！
以前商界崇尚人人係sales，個個崗位都可以係好識得推銷自己或者公司品牌嘅sales，今日呢，就更上一層樓，人人係公關，個個都有能力搞好自己同公司嘅面子，同時亦都可以將個形象徹底破壞，軟銷嘅年代，形象就是一切。
形象畀邊個睇？球迷！形象邊個同你建立？傳媒！所以新一代全方位嘅教頭，識搞一定三管齊下一齊搞。
上一代唔明咩叫呃like唔怪得佢嘅，但新生代教頭已經有幾位相當識玩，高路普就係攞滿分代表，對球員輸贏都攬埋一嚿交晒心，對傳媒鋪鋪有soundbite，一句我係普通人就已經高咗摩連奴一班。對球迷呢，就落親場都會對住看台一齊叫一齊笑，值回票價啦吓話！
新生代之中嘅教頭有幾個都相當識玩嘅，韋斯咸嘅比歷講嘢非常之啱聽，水晶宮嘅柏度非常之識帶氣氛，屈福特嘅科里斯就非常之有型，幾位都係未來球迷同傳媒嘅寵兒。
香港呢，近排都有啲與時並進feel，南華搵番頑童度士上山，已經攞番晒球迷嘅心，而東方仲勁到請牛丸坐正，賺到球迷嘅親切感，亦為媒體帶嚟唔少正面話題；新生代球壇，都係受軟唔受硬。
KEYMAN
節目主持