前利物浦中場路爾斯加西亞一月加盟中岸水手，憑佢幫紅軍拎過歐聯同英足盃嘅威水史，就算已經37歲，都算係澳職最具名氣外援。上周六作客威靈頓鳳凰，加西亞可以話光芒四射：佢下半場先後備入替，50分鐘已經一記乖巧後腳射門幫水手先開紀錄，亦都取得加盟首個入球，加西亞之後再交出兩次助攻畀史唐路斯同米治柯士甸各入一粒，就算鳳凰憑比歷克包維補時階段破蛋，水手仍以3:1大勝，取得加西亞加盟後首勝。
同日其他澳職都好多波入，前列大戰布里斯班獅吼作客以3:1大勝FC悉尼，力壓上周五輸波嘅墨爾本城升上第二位。另外，墨爾本勝利作客珀斯光輝，一度落後0:2下追平2:2，但有賓卡法拿兩黃一紅被逐之下，最後仍以2:3落敗。