2015年嘅朗尼，被球迷插到飛起，但一踏入2016年，似乎呢位曼聯隊長轉運。佢喺上周五嘅英足盃第四圈入咗球靚波，幫曼聯作客以3:1淘汰打比郡，另外佢自己今年六場比賽射入六球，腳風順到不得了。
每逢曼聯輸波後，英媒總係落井下石，曼聯上場聯賽不敵修咸頓，有報道話如果呢場被打比郡踢出局的話，雲高爾就會被炒魷。今季經歷N次「被炒魷」嘅雲高爾，相當命硬，呢次都平安度過。最抵讚嘅肯定係朗尼，30歲嘅朗尼好似後生咗10年咁，喺16分鐘左路扣過兩個守衞，禁區頂起右腳彎入，幫紅魔領先1:0。朗尼今年真係唔同晒，喜事重重；三仔Kit前排出世，佢又做老竇，家陣仲執番對唔見咗半季嘅射門鞋。由月頭對史雲斯場波計起，朗尼近六場射入六球，其中對紐卡素仲梅開二度。
雲高爾：悶蛋曼聯都有人睇
雖然曼聯完半場前被追平，但靠戴利白蘭特同桑馬達換邊後各入一球，幫紅魔贏3:1，順利晉級。呢場曼聯爭氣，最開心嘅梗係領隊雲高爾啦，佢日日被球迷插佢打悶蛋足球，終於可以威番次。唔知佢係真心讚魔迷定抽水嘞，雲帥賽後話：「太難以置信，佢哋仍然肯嚟睇『悶蛋曼聯』！」雲高爾仲話，成隊波嘅信心已經返晒嚟，但我求大俠就覺得聽住先啦，今季次次曼聯一贏波，雲高爾就雄心壯志話爭標，但之後就變番坐輸望和嘅悶蛋足球。