心情，是最難預測的。
上星期二，Tina在朋友家參加派對時，收到代理Marco語帶溫柔的來電。「Tina你好，三個月前你搵我哋放盤那個都會駅三房一套單位，𠵱家有人還價730萬，仲帶埋定金支票嚟，好有誠意，你會唔會考慮吓？」「No！你當我儍呀？低層近望公屋景先賣呢個價！我個單位向東南，望泳池兼望海景，又有百萬豪裝，冇800萬你唔好打嚟！」屋內眾人隔着電話也聞到火藥味。
「Tina，你有冇留意最近向西村上春樹篇潮文？𠵱家市區半新樓10,000蚊呎已成常態喇；況且地產潮文都話幾年後可以用400萬住1,000呎；最近元朗凹頭幅地又流標……」「Marco，難道你相信樓市會大跌？湯文亮都認咗細價樓爆煲論唔準確啦！你冇理由唔知，好多資深基金佬、地產投資者、代理，個個都話樓價唔會跌多過兩成！730萬買兩房都未必得啦！我對你的智慧有點失望！」在地產舖的Marco吞聲忍氣，努力游說Tina接受準買家出價。
「Tina，𠵱家時代唔同喇。一年前仲係業主話事，準買家要接受業主開天殺價；美國已經加息，家陣人人都驚買貴兼買錯，業主想賣樓的話可以點？我近月做的成交唔係一手樓就係減價貨，如果我係你就會接受出價喇。」「Marco，我個單位正正常常，唔係劏房，有番咁上下保值能力，希望你尊重吓。」說罷Tina便掛斷電話。
代理所指的心情問題，有時候未必因業主心怯而減價求售，而是業主在高興時刻收到還價來電。
地產小子
http://propertykids.blogspot.hk/