法國老將巫斯義賽前一日親自為戰馬加課，幾乎絕對僅有，幾個月都未必有一隻，但這個「奇景」偏偏今朝(30日)出現了。他現身替周日第七場1200米一級賽百週年紀念短途盃的摩廐馬「恩格斯」做工夫，而且還是在大圈快踱，大有加操催谷狀態的味道。而且操完巫斯義更走上烽火台，與大摩共商搏殺大計，明顯此駒今仗絕非陪跑性質。
「恩格斯」表面實力不及「幸福指數」、「友瑩格」、「大運財」，但此駒今季只一戰，於1000米三級賽國慶盃成79倍大冷門，全無人睇好，排直路賽不利的內檔下，隨意一衝就後上第四，可見戰鬥力仍甚強，佢比起今場幾匹主要對手的優勢，在於國慶日出賽後，就一直操而不戰養精蓄銳，期間試過三次大閘，做足準備揀今場復出，根本志不在小。
今仗「恩格斯」更喺配備上作出變動，除眼罩而改戴面箍，睇番最近一次「恩格斯」試閘，正正有戴面箍，隻馬走起嚟既輕鬆又集中，名次較後純粹當日貼欄跟跑直路受困，其實呢個配備對佢提升競逐意慾，應有正面幫助。加上今仗抽得一檔好跑，難怪巫斯義咁神心，今朝要親自操一課先安樂了。