玩具大王蔡志明可謂兒孫滿堂，女兒蔡加敏、蔡加怡和兒子蔡加讚婚後迅速開枝散業，蔡加讚和汪圓圓前年誕下長女Celine後，本月18日宣佈再誕下一對孖仔Christian和Kameron，為蔡家繼後香燈，蔡加讚更揚言想生一隊籃球隊。
蔡加怡前日在灣仔君悅出席東華三院145周年慈善晚宴即宣佈陀B五個月，由老公陳漢聰陪同穿上粉藍色晚裝的加怡說：「𠵱家有咗五個月，今胎係第二胎，要保持神秘，我自己知道都唔講住。今次同第一胎一樣，都係開刀生。」蔡加怡第一胎是女，今次會不會想湊一個好字呢？她說：「都冇所謂，我第一件事都問醫生係唔係孖胎，不過醫生話唔係。陀B初頭都辛苦，𠵱家已經好咗啲。上次陀女想食清啲，今次就直情冇乜嘢胃口，都係食啲煎炸同冇益嘅嘢。」蔡加怡表示大女有時會攬住她的肚錫錫，被問到想生幾多個？加怡望一望老公，然後說：「兩個已經好好，諗到將來好多小朋友就好開心。」
提孖B加讚笑唔停
蔡加讚前晚單人匹馬到場，汪圓圓已經出院在家坐月，蔡加讚說：「圓圓身體狀況好好，不過生完兩個始終辛苦，我盡力幫手湊BB，不過BB出世後，我都要返內地工作。」提起孖B蔡加讚笑不攏嘴：「BB𠵱家似我多啲，不過都唔會再生喇，𠵱家已經好開心，未諗到改乜嘢中文名。」蔡加敏則表示弟婦圓圓好落力，稍後會教她如何修身，加敏說：「佢都好弗，細佬湊B又好熟手，新年我哋全家人都會留喺香港，所以會好熱鬧。」
另外，東華主席何超蕸被問到老友楊千嬅憑《五個小孩的校長》獲提名金像獎影后，她說：「係咩？恭喜佢，不過我今日冇留意，佢係熱門，亦係我老友，佢喺電影裏面好努力，希望佢為港爭光。」
採訪、攝影：卓寶花
