這天練馬師霍利時到場後，原本在烽火台附近跟人打牙骱，但7時10分左右，突然駕高爾夫球車，泊定定響通往馬房嘅閘口，原來在等「情趣」操回來。
「情趣」今朝由出賽騎師蘇兆輝出跳，出跳前往跑道時，已見蘇兆輝拍拍馬頸鼓勵牠，顯得好鍾意呢隻馬，而馬兒在大圈亦走勢良好，身壯而不重身，步伐有勁。操完蘇兆輝策馬步返閘口，跟霍利時會合，當時霍利時眼定定盯實「情趣」，好緊張隻馬嘅進度，蘇兆輝落馬後亦主動向霍利時匯報一切，傾個唔停，可以話盡露搏殺手影。
「情趣」將列陣周日（31日）第十一場三班1400米，隻馬在港兩戰配雷景勳、霍勵賢成為大冷門都輸唔遠，肯定已經試準兼熱夠身。今次用蘇兆輝，可以話係最佳人選。
事關蘇兆輝曾喺英國騎過「情趣」兩次獲一冠一季，贏馬嗰次正係響1400米大勝對手三身位，堪稱最熟悉此駒脾性，周日人馬異地重逢，出埋王牌排4檔，負123磅好輕鬆，大有機會打開在港勝門。