出席「數字王國」（Digital Domain）收購「朝霆」八成五股份嘅記者招待會，就明白兩文三語好重要，司儀方健儀先讀廣東話講稿，後講英文，再要講埋普通話，來自台灣嘅「數字王國」（547）行政總裁謝安就先講普通話後講英語，謝霆鋒一上台就話Let's go trilingual。想話在香港社會走上成功路，第一步就係掌握兩文三語先，乜唔係啫，科技祖宗係美國，大市場在中國，財技中心係香港，唔識齊三種語言，點撈得掂？在座有一位女律師Julia Charlton，佢自1987年來港，講普通話流暢到不得了。
左丁山有時對新事物矇查查，以為Digital Domain係動漫一類，誰知睇完介紹片，先知道錯得離譜。呢間公司大力推動VR（Virtual Reality）（虛擬現實），360度視覺錄影，特殊視覺效果（Special Visual Effects），各位去睇過鐵達尼號，變形金剛一二三，Iron Man 3 以及Furious 7，就會領略到上述科技有幾真實，有幾震撼。謝霆鋒嘅「朝霆」（PO Group）就為匯豐、渣打、蘋果電腦、新力、可樂、BMN、平治、奧迪等牌子做過不少加插VFC、VR效果嘅廣告片。
最近潮流興講科技，創新科技局如何去推動科技發展項目呢？相信去搵吓謝霆鋒傾吓有着數，香港有不少電腦迷，但未必識搞DD與PO嗰種電腦製作效果，創科局與楊局長鼓勵年青人入電腦製作，虛擬現實呢一行，應該算係再工業化啩？
弊在香港讀書尖子只對最容易搵銀嘅學科有興趣，讀醫科做醫生是永恒的，打風打唔甩，讀Global Business做iBanker係潮流最hot的，十幾年來皆如是，至於入大學讀電腦科技及創意藝術（如VR）囉喎，好多時係排名最後。一位科技公司總裁與工學院老教授相熟，老教授同佢講：「我快要退休，唔駛再煩嘞，30年前，有科科A學生嚟叩門希望入嚟讀。現在呢，我地見到一啲4科C（相等於DSE考4個5，因前面有5孖星，5一星），我會親自求佢入學院！」梁特首話要搞香港高科技，唔該首先扭轉呢種讀書心態，缺乏一流學生入讀電腦相關嘅工程學科，講「再工業化」只怕係虛擬現實。現在教育局話要推動STEM教學及課程並非對症下藥，因為就算學生讀STEM讀得好，學校教得好，最後得益者只係醫科及商科，工程學院冇人吼，得個吉。