政府昨宣佈民政事務局副秘書長楊德強獲任為體育專員，2月1日正式生效。八方之前都講過，呢位體育專員係運動健將嚟㗎，曾經係港大最佳運動員，據聞佢球類活動同長跑都好耍家，八方噚日搵到張楊德強波牛相（圖），證明佢真係落場踢得兩腳！
民政事務局局長劉江華話，楊德強既熱愛運動，又曾經協辦2008年北京奧運同殘奧馬術項目，做元朗民政專員時又積極推動地區體育活動，相信佢勝任新職，楊德強就話期望同體育界及其他持份者緊密合作，同心協力推動香港體育發展，不過八方之前睇過好多網民話，政府同楊專員如果真係想搞好體育，唔該第一件事先搞搞香港足協，仲有港協暨奧委會先，唔好再畀班冇心搞體育嘅人霸住搞喇！