為期3年嘅全港性精神健康推廣活動「好心情@HK」噚日展開，食衞局長高永文致辭時話，2014至2015年接受精神科治療人士超過21萬，比5年前增加兩成，介乎18至64歲人士中，有8成人曾於30日內感到不同程度嘅精神困擾，反映港人精神壓力真係好大。
高永文以自己為例子，話自己之前跑步意外跌傷塊面，搞到變「花面貓」，當時佢都一度「想收埋自己唔見人」，好彩有同事鼓勵同專業人士幫助，證明社會對精神病患者支援十分重要。為提高市民對精神健康嘅認識，高永文更會粉墨登場為活動拍攝「好心情@HK」宣傳片。政務司司長林鄭月娥噚日致辭時就笑笑口話，雖然擔任問責官員壓力好大，但仍然會保持心境愉快。