林子祥（阿Lam）一連4場「佐治地球40年」演唱會前晚在紅館開鑼，為了回顧入行40年，他唱出不少懷舊英文歌，和很多顫動人心的名曲。開場時，阿Lam唱出首本名曲、由潘源良填詞的《最愛是誰》時忍不住喊，其後他再唱潘的作品《憑着愛》，及已故填詞人黃霑的《抉擇》時再感觸落淚，先後三度淚灑舞台。
懷念耀榮叔
68歲的阿Lam提到一班離世的好友，更勸勉所有感到灰心喪氣的香港人：「我生命中好miss（懷念）嘅3個人，都離開咗，張耀榮，做歌手個個識佢，個個都要多謝佢，佢幫咗好多人；喺度睇過David Bowie（大衞寶兒），又跌過落個窿度，40年來有好有唔好，新一年希望大家都變孫悟空，香港人我哋要有禮貌，我覺得𠵱家大家好似冇咗咁，希望大家畀啲愛心出來。」
太太葉蒨文（沙麗）和兒子林德信合唱完之後，沙麗突然有料爆，然後拿出貓紙讀：「呢位林Sir係一位好有才能同萬能嘅藝術家，但係佢有好多怪癖，例如佢喺屋企講嘢好細聲。成日行入房我都唔知道，嚇死我，但係上到台就鬼死咁大聲。第二個就係好多架車，有成5架車，成日自己抹車，對車講BB話，見Lam出去，問佢用乜嘢車，佢就話『坐小巴，好快到，我有長者半價』。Lam好貪靚，好鍾意買名牌，專門去救世軍買埋買埋好多，同我講又平又抵，又鍾意名牌label，連我啲衫都着埋。我19歲佢作咗首歌畀我，雖然《零時十分》喺馬桶度寫，都好多謝佢，將我事業帶到咁高峯。」
阿Lam騷後受訪時被問到為何不停喊，他解釋說：「係呀，諗到40年咁耐，遇過咁多人，咁多朋友，有啲年紀大，有啲過咗身，唱到嗰啲歌，雖然嗰啲係情歌，但係唔一定係講愛情，所以好大感觸，對我好大影響，唱到《最愛是誰》諗起好多回憶，好多人。」
採訪：曹家誠
攝影：陳志嵐