近日天雨一直下個不停，不過周日（31日）沙田賽事會否跑極淋場地，仍屬未知數，但應不會像上個星期日般，氣溫跌至攝氏3度，入場睇馬起碼唔會凍僵。重頭戲之一1200米一級賽百週年紀念短途盃，「大運財」、「幸福指數」、「友瑩格」和「新力風」順序抽到理想的2至5檔，有利發揮應有實力，落敗的馬匹不能以檔位做藉口，反觀第六場四班1400米嘅「急急腳」，就冇這種運氣咯！
蘇偉賢馬房之「急急腳」如果參選今季最冇運馬匹，至少喺候選名單之中，至今出賽四次，頭三次同樣抽到13檔落第，上仗運氣稍好轉抽到6檔，即後上如飛得亞軍，相隔一個月周日再戰1400米，結果再被電腦「玩弄」，衰過13檔，抽到最外的14檔，仲唔係「地獄黑仔王」？
唯一令人稍為安心是「急急腳」擺明質高，之前三次抽到13檔，加上狀態進度未夠之下，仍有兩次表現唔錯，一次放入第五，另一次則交出凌厲追勢，殺入一席殿軍，可見呢匹質新馬根本有分喺手。鞍上人柏寶曾被問到如何克服劣檔，他拋下一句：「ride for luck」，即是需要靠好運，希望早段跟隨其他外檔馬切入，講得夠晒坦白。
從狀態角度看，「急急腳」上周試閘柏寶早段唔騎，直路亦按實，但隻馬仍自動湧上追近，計馬夠晒fit，實力亦毋庸置疑，只要有運氣幫助，及早切入，分分鐘可以克服劣檔，打開勝門。