慶祝自己生日，唔一定好似岩布仙尼咁唱生日歌畀自己聽咁膠，英甲維爾港中場米高布朗就諗到一個特別嘅方法同隊友慶祝。呢位前熱刺、富咸老將，星期一就過自己39歲生日，周四佢就特登租咗架雪糕車，放喺球隊練習基地門口，自己整軟雪糕俾隊友食。米高布朗就話之前請過食蛋糕、烙餅、牛角包等，隊友就鬧佢冇新意，所以今次就搞吓花臣；不過米高布朗整嘅軟雪糕歪歪斜斜，真係要惡補吓技術嘞！
