乘着2014年的《西遊記之大鬧天宮》在內地狂收近11億票房佳績，導演鄭保瑞再接再厲在猴年賀歲檔推出《西遊記之孫悟空三打白骨精》，郭富城由牛魔王轉演孫悟空，又加入鞏俐飾演白骨精，卡士依舊星光熠熠，城城更花了不少時間鑽研為人熟悉的孫悟空，誓將孫悟空升級。
撰文：曹家誠
電影《西遊記之孫悟空三打白骨精》將定於農曆大年初一上映，戲中飾演孫悟空的郭富城、沙憎羅仲謙和導演鄭保瑞日前接受本報專訪，鄭保瑞先開宗明義表示今集故事更着重人物關係和劇情，此亦是選擇城城取代甄子丹成為孫悟空的原因：「《大鬧天宮》劇情係比較單純動作啲，但今次講人物關係、劇情嘅比重多咗，所以選擇城城，佢跳咁多年舞有動作底，演出大家亦認可，所以有信心演到比較有層次嘅悟空。」
突破舊印象
事實上孫悟空的故事無人不曉，為演活這個有層次的角色，城城稱早在開拍前已做足功課：「最好參考人物係國內嘅著名演員六小齡童，喺國內一講孫悟空呢個角色，大家就會諗起六小齡童，佢由細個已經喺戲班入面開始做美猴王，我睇過佢一個訪問，話自己已經係一個猴王，反而係諗點樣去演一個人，可想而知佢呢個美猴王幾有心得。」
電影開拍後，角色所需的超長化妝時間及高難度的打鬥場面，均叫城城苦不堪言：「個猴妝要每日凌晨4點開始化妝，一路化到中午先開始拍，拍到收太陽就收工然後落妝，其間連水都唔敢飲，因為除件戲服去洗手間再着番要個半鐘頭，連續兩星期日日如是。」城城更直言今次是從影以來最辛苦及最大挑戰的一次。
首集在內地獲得極高票房，到今集製作上對內地市場的比重自然不言而喻，城城都直言：「同一個故事點樣完全唔一樣，《大鬧天宮》講緊係10億嘅票房，可想而知大家對《西遊記》呢個作品嘅認可，點去突破呢樣嘢，導演今次就加入咗好強嘅陣容，有羅仲謙、小沈陽、馮紹峰，佢哋嘅演出大家喺拍《黃金時代》、《狼圖騰》等作品都睇過，而且加入謙仔同我哋有好多火花，大家會見到一個完全唔同，好大突破嘅謙仔。」
最有型沙憎
講到拍檔羅仲謙，城城讚不絕口：「佢好有天份、好聰明，掌握到角色之餘，仲建立咗個新風格嘅沙憎，好難得。我覺得謙仔係歷來最有型，最靚仔嘅沙憎。」至於謙仔亦對今次的拍攝經歷大表難忘：「今次打鬥場面好多，其實古裝武打今次係正式第一次拍，完全係由零開始，一早就上內地學耍月牙棒，第一場戲就要同城城打鑊勁嘅，比我想像中難，我完全係零開始，所以我認同城城咁講係最甘，今次經歷完我以後乜都唔怕。」
面對今年賀歲檔有周星馳的《美人魚》及周潤發、劉德華主演的《賭城風雲III》等強勁對手，導演就講得相當坦白：「我自己唔諗太多，總之做好部戲，票房唔理得咁多。」而城城就表示：「我覺得新年有好多唔同電影，當然想百花齊放，希望大家睇我哋嗰部又會睇唔同電影，我相信啲朋友都會自動自覺去捧場。」
場地提供：香港銅鑼灣皇冠假日酒店
郭富城
髮型：Ian Wong of ii salon
化妝：Terry Yu
羅仲謙
髮型：Jan Chiu of IL Colpo
化妝：Leo Tam of Annie G.Chan
服裝：A Bathing Ape, Avenue 1218