二戰後成立嘅香港社會服務聯會，明年就踏入70周年，為「隆重其事」，社聯行政總裁蔡海偉（圖）噚日同傳媒午宴時正式宣佈「唔搞晚宴」。八方聽見即刻讚好，作為NGOs嘅聯會組織，帶頭唔做歌功頌德嘅門面工夫，做番本份幫助基層。主席陳智思知道社聯唔會搞晚宴，都舉腳贊成，蔡海偉就建議留番啲錢，未來5年推動長者友善措施同扶助小型NGOs，總好過花錢自娛。
退保諮詢進行一個多月，蔡海偉覺得社會討論氣氛唔錯，仲記得10年前社聯提出全民退保方案時，都係得小貓幾隻。不過佢擔心社會慢慢冷卻，諗緊計點令討論繼續升溫。下月14日人日兼情人節，社聯就罕有殺入旺角行人專用區，同五湖四海人馬講全民退保；亦會向各NGOs派發發聲卡，畀唔同階層人士表心聲，整理之後會就提交畀政府。