曼城真大鑊，今季加盟之後不斷入波同助攻嘅中場奇雲迪布尼要唞10個星期！喺周三場英聯盃四強，迪布尼膝部受傷，睇見佢痛苦倒地嗰樣都心知不妙。雖然佢經理人最初透露，迪布尼唞六周就掂，但呢位今季以5,500萬鎊（約6.2億港元）身價加盟嘅比利時中場，之後親自喺網上宣佈，要休戰10周，意味住佢唔單止踢唔到下個月對利物浦場英聯盃決賽，仲會缺陣歐聯16強對基輔戴拿模嘅兩回合比賽，另外亦趕唔切喺三月底場英超曼市打吡中復出。