花旗香港逆市開新分行，尖沙嘴海港城店噚日開張大吉，除咗有靚女同事做主持，仲有舞龍舞獅助興，不過，點解牆上用簡體字寫「离岸银行中心」嘅？
花旗香港零售銀行業務主管林智剛（Lawrence）話，海港城係華洋共處嘅地方，唔單止serve香港人，內地與台灣人都好歡迎，強調：「唔只有簡體字，都有繁體字㗎。」
不過，佢承認，多咗內地人幫襯，𠵱家客戶比例係一半半。內地人多數來港買保險，特別係萬用壽險與危疾險，佢哋亦想sell啲有錢「大款」開信託，或者買投資產品，內地人對美股都幾有興趣咁話。
好多人奇怪，𠵱家潮流興手機同網上銀行，點解仲開新分行，Lawrence就話，電子銀行與分行唔係「你死我活」，銀行其實冇縮舖，可能有啲租約到期要搬啫。另外Lawrence仲有個好消息，就係話今年花旗冇裁員計劃，有冇人工加就冇講。