「街口有落！」你禮貌嗌聲落，佢拼命去飛馳，小巴佬畀人嘅感覺，除咗粗獷嘅外型、渾然天成嘅粗口，仲有極速傳說鄭伊健嗰手車。簡單啲講，真‧林雪，可能就正正代表住大家對某一族群小巴佬嘅印象。但自從呢位小巴司機嘅出現，你冇諗過嘅事情通通發生咗。「早晨，小心啲、搵位坐好」「扣好安全帶」「o依家轉彎，小心坐穩」「準備到站，各位攞齊嘢」香港地真係變得咁有禮貌？你冇聽錯佢冇講錯，講以上呢番窩心說話嘅，正係一位非一般小巴佬——劉炎楷。
記者：鄒倩婷、陳希雯、梁智威
攝影：陳家文
踏入2016，社交網站上瘋傳一位彬彬有禮嘅小巴佬，由開車到落車都不時提點乘客，其無微不至嘅關顧，換來不少like and share。其實呢位咁有禮貌嘅小巴司機楷哥，駕駛來往沙田港鐵站與瑞峰花園之間的68K路線，只不過兩年光景，但其有禮事跡，卻已在網上廣傳千里。
「我首先係揸貨車嘅，係車去棉花廠，後來生意唔好，老細就索性執笠。」楷哥嘅禮貌蛻變史，原來都幾傳奇。「後來我走咗去屯門東華三院戴東培老人日間護理中心，睇到我嗰位主任對待老人家，點樣關心佢哋、照顧佢哋，學識咗呢啲之後，我就揸咗小巴。」
小編訪問期間，恰巧有位哥仔漏咗隻DVD喺小巴度，小編亦正好將楷哥嘅處理過程一一紀錄低。睇住楷哥不斷用無綫電聯絡站頭與各小巴司機，務求將失主喺人海中搵返出嚟，小編感受到，楷哥平時嗰份禮貌，並唔係一種人肉錄音機嘅機械式反射，而係真真正正發自內心。
「我啱啱出世有個孫BB仔，我都會同佢講教吓佢，公公都有咁表現，你都要學吓喎！」講到個孫，楷哥即露出一副慈祥外公嘅笑容，但其實楷哥嘅有禮貌，又何止感染到孫BB呢？「朝頭早有姐姐帶小朋友返學，跟住有啲姐姐就話，你睇吓呢位司機咁有禮貌，你都要學吓！」身教重於言教，怪獸家長們，有嘢落袋了。
網民曾經洗咗幾板嚟讚賞楷哥，小編亦用咗數百字篇幅嚟表揚楷哥，但係去到文末，小編不由得要來個大推翻——乜做人有禮貌，唔係應該嘅咩？或者大家會話，咁有禮貌嘅小巴司機並不多見，值得表揚以作榜樣，但好一句「並不多見」，其實係咪突顯我哋習慣咗黑面先係正常？還是香港早已變得太冷漠，所以「有禮貌」竟然變成一則新聞？曾經小編仲讀緊書嘅年紀，老師同小編講香港係一個禮貌之都，但去到今時今日，我哋稍稍見到有禮貌嘅正常人已經趨之若鶩、瘋傳瘋讚。咁，有冇覺得我哋大家都有啲荒謬？
「香港地真係變得咁有禮貌？」文初，留下了這句伏筆，文末，衷心祝願香港地並唔係「變得」咁有禮貌，而係從來都應該要咁有禮貌。或者各位「真‧林雪」小巴佬同每一位你我他，都要#多謝楷哥帶出呢次反思機會，讓我們好好反省禮貌的本義。