以歌論政，港台《頭條新聞》先係先鋒。新一輯《頭條新聞》小休後下周六復出，好彩仲見到吳志森、曾志豪、羅啟新呢啲「眼中釘」做主持。自由黨榮譽主席田北俊，以及上水鄉事委員會主席侯志強獲邀喺節目中獻唱，無懼走音，欣賞指數爆燈。
田少揸住豬隊友面具示人，兼獻唱《舊歡如夢》，侯志強則唱《風雲》。田少話，以前做保皇黨、建制派好容易，但家吓政府做嘅嘢，真係好難支持，但佢婉拒吳志森建議唱《好心分手》喎。
侯志強話，《風雲》係表現新界人柔情，認為外界對新界人組黨有誤解，佢話組黨係為自己發聲，唔好靠人。咁佢組嘅黨係咪反對黨？佢話個黨係支持正義中立，如政府做得衰，一定不留情批評，「如果遺害人間嘅，吠佢啦！」嘩都好「柔情」喎。