眾所周知，恒基地產（012）「樓神」林達民一向重視形象，每次現身都由頭到腳執到好四正，噚日佢率領公司營業（一）部一班高層簡介今年賣樓情況，竟然人人一套桃紅色西裝，五條King咁樣，睇到在場記者嘩嘩聲。
林達民解釋，此乃一個好顏色，畀人感覺「好精神好開心」，佢強調，揀呢隻顏色係團隊決定，「希望過年大展鴻圖、開紅盤」。不過望多兩望，大家覺唔覺得佢哋呢個look似曾相識，有啲似藝人許紹雄喺海狗丸廣告入面嘅造型呢？好似撞咗衫喎。
講番恒地今年賣樓部署，營業（一）部今年準備開賣之項目有成1,400個商住單位，涉及8個項目，林達民話希望做到每季有盤推，樓盤數目比舊年多，仲話今年就會考驗到各大發展商嘅實力，意有所指喎。