電影《家有囍事》喺好多人集體回憶，當年剛冒起嘅周星馳同張國榮（哥哥）鬥戲，拍攝時扭盡六壬，喺化學效應下產生咗好多經典場面。今年《家》片經過復修，加上10分鐘韓版結局再戰戲院，黃百鳴早前接受訪問時話：「呢10分鐘片係當年拍畀韓國嘅槍戰版，講常家3兄弟勇救程大嫂，呢個ending，香港觀眾未睇過。」
哥哥狂度橋
黃百鳴回想當年，張國榮覺得周星馳咁貴又啱啱冒起，唔想輸所以自度咗好多嘢，掟麻雀落廁所就出自哥哥手筆。而戲中「巴黎鐵塔反轉再反轉」，間接係周星馳逼出嚟，黃百鳴話：「第一次做編劇嘅谷德昭負責服侍周星馳，周星馳一睇完編稿講咗句『吓﹗咁就係劇本呀？』呢句話好hurt當時仲係年輕人嘅谷德昭，之後佢打電話畀導演，話『我唔做嘞！』結果俾導演高志森鬧咗佢成粒鐘，話人哋講一、兩句說話你就放棄，你點樣喺電影圈撈，結果佢痛定思痛，返去睇晒周星馳所有電影，之後再寫過對白交畀周星馳睇，咁就OK！以後周星馳嘅戲都一定搵佢做編劇，仲做埋導演。」
撰文：馮仁昭