李克勤出戰湖南衛視《我是歌手4》歌唱比賽節目，玩到今晚播出的第三集，據知克勤演繹張學友《遙遠的她》終於首奪第一，為香港歌手和廣東歌爭番口氣！
囝囝狂踩
克勤於首集唱譚詠麟《霧之戀》僅得第三，囝囝知道後好失望說：「吓！點解唔係冠軍？」第二集克勤唱郭富城《當我知道你們相愛》名次更跌落第五，囝囝竟然說：「Mom said you're not good！」克勤聽到一殼眼淚！今次終於得第一，可以在囝囝面前威番次，囝囝開心說：「Finally you got it.」因為在囝囝的眼中，爸爸永遠是第一。
節目還播出克勤和學友的短片，原來今次克勤揀唱學友的歌曲，還向歌神請教指點，克勤表示自己參加了《我是歌手4》，想唱《一千個傷心的理由》或《遙遠的她》，學友就說：「唔使諗，一定唱《遙遠的她》，因為好多高音位。」克勤即請人重新編曲，果然一嗌奪冠，據知李玟唱《Price Tag》獲第二，韓國歌手黃致列唱《一路上有你》獲第三。
「唔可以Hea」
昨日記者致電克勤，問有否向學友報喜？他說：「嘩，你啲消息邊度嚟？大會唔畀講賽果，不過學友都戥我開心。自己唱咗咁多年歌，今次壓力都好大，每個歌手都係超水準，唔會有人走音出錯，大家好投入做到一百分，今次參加唔係為攞第一，大家鬥專業，一個唔留神會比下去，所以好緊張，每次都唔可以hea，自己仲要做主持，辛苦好多，不過證明冇失禮香港人，我嘅普通話大家聽得好明白。」
採訪：皓騫