費格遜終於可以喺曼徹斯特睇到場精采嘅比賽嘞！呢位前曼聯主帥周三入場睇同市宿敵曼城對愛華頓嘅英聯盃四強次回合，見證曼城平反首回合敗局，以3:1贏波，總比數以4:3擊敗愛華頓入決賽。不過，奇雲迪布尼嘅入波極具爭議，個波應該出界在先；呢位比利時中場尾段仲膝部受傷，唔知要唞幾耐。
費Sir難得有入球騷睇
費格遜今季喺奧脫福睇咗大半季悶波，真係睇到瞌眼瞓。為咗搵場好波嚟睇吓，佢老人家去咗睇曼城對愛華頓嘅英聯盃。曼城首回合落後1:2，呢場要焗攻，點知18分鐘就被愛華頓嘅巴克里先入一球；之後曼城由費蘭甸奴追成1:1完半場。上半場竟然可以有兩個入球，相信費Sir都好耐冇睇過！
迪布尼膝部韌帶受傷
喺70分鐘，史達寧落底傳中，迪布尼撞射入網，幫曼城反超前2:1，兩回合追成3:3！不過慢鏡所見，史達寧出波之前應該帶咗個波出底線在先。76分鐘，阿古路入多球，曼城次回合贏3:1，兩回合反勝4:3打入決賽，將會同利物浦爭英聯盃冠軍。賽後愛華頓領隊馬天尼斯非常憤怒，批評球證睇唔到史達寧帶波出界，令到佢哋捧盃之夢破滅。雖然曼城晉級，但完場前收到個壞消息，迪布尼膝部受傷；領隊比歷連尼話：「最樂觀去睇，希望佢唔會收『咧』！隊醫話佢都唔肯定傷勢，可能係傷內側韌帶。」
