謝霆鋒賣朝霆 - 左丁山

謝霆鋒賣朝霆 - 左丁山

自本欄發表傅會長嘅談話後,循例有不少讀者來電郵問去邊度買太歲牌。左丁山在此亦循例咁回答,為咗避免商業化,本欄唔會透露去邊度買太歲牌,否則易惹人誤會,以為左丁山替人做生意。
其實好多廟宇都有太歲牌賣,左丁山每年到沙田車公廟上香,就見到有不少人拜太歲兼買番一個車公廟嘅太歲牌,道理係一樣嘅啫,如果大家相信呢樣嘢,去寺廟祈福拜太歲,求心安理得便是。
傅會長講乙未年十二月(即2016年1月)己丑月,因年月相沖相刑相害,市道不佳,又真係幾準,成個一月股市就係死吓死吓,跌多升少,破紀錄咁熱嘅2015年一踏入2016,就由熱轉冷,居然出現59年一遇咁冷嘅1月24日,震動大帽山。世事就是如此奇妙,令人意想不到,但唔通因為咁,就唔做生意咩。
天皇巨星謝霆鋒就一於唔信邪,在此股市變幻莫測時刻,將佢創辦嘅「朝霆」(電影、廣告後期製作公司)出售八成五。俾邊個?就係賣俾上市公司Digital Domain(數字王國)(上市公司編號547),買賣條件幾複雜,誰賺誰蝕一時計唔清,有興趣讀者請睇財經版,左丁山冇篇幅詳細講,而且內容亦會好悶㖭。
唔悶嘅就係電影後期製作技術,左丁山睇過荷李活電影Transformer(電視版),對啲變形金剛特技嘆為觀止,呢日公關大姐大捉左丁山去見識吓最新製作科技,出席「數字王國」/朝霆記者招待會,同場加映兩齣宣傳片,先知道香港不少著名廣告由朝霆製作,「變形金剛」係「數字王國」所製作。公關大姐大講:「以前我拍片,要搭佈景,燒車要用好多錢兼且容易惹麻煩,俾天氣玩死,但現在拍片可以在室內電腦搞掂,要乜有乜,飛車追逐,爆破白宮,直情真嘅一樣,此乃世界科技潮流,唔搞就落後於形勢。」係嘅係嘅,「數字王國」在美國電影圈已係響噹噹名字,朝霆在中國內地亦大把人認識,兩家合併,顯然就係要將荷李活尖端電腦製作科技引進內地市場,尋求雙贏,呢間數字王國嘅CEO係台灣人,COO係印度人,創作總監係黑人,成間公司講英文與普通話及電腦語言,謝霆鋒肯將親手創辦嘅朝霆放入去,即係間接承認團結好辦事,要打世界波,就要走出香港,放眼世界,擁抱中國市場。