身家億億聲嘅新一代男神、近年由商入政嘅青年事務委員會主席劉鳴煒MW，原來好鬼慳家㗎！佢噚日朝早出席DBC數碼電台節目時，現場有位好眼利嘅記者發現，佢件西裝褸嘅背脊位，竟然有一條好明顯嘅補痕！有女記者事後忍唔住問劉鳴煒，咁做有冇特別意思？
手工麻麻 任影唔嬲
原本趕住離開現場、話明只答多一條問題嘅劉鳴煒，聽到女記者臨尾問呢啲，一啲都唔介意，坦言：「孤寒囉！冇意思㗎！我又唔係着住呢件衫嚟選美，咁補番咪着囉！」
佢之後仲喺徇眾要求下，轉身做「影后」，畀個背脊穿窿位大家任影唔嬲，更笑言：「我未俾人咁影過」，之後就真係急急腳走！八方睇過，發現條補痕都有5厘米長㗎，咁都唔丟，喺富二代中應該幾罕有，雖然縫補手工麻麻，但呢份慳家誠意十分可嘉！
其實劉鳴煒慳家，亦唔係第一次，據報佢早年喺英國讀書時，爹哋劉鑾雄曾經幫佢買定頭等機票，佢就改坐經濟位，龍鳳胎亦喺公立醫院出世，返港後亦同一般人咁坐港鐵，仲話到明最憎食富豪飯堂福臨門，即係佢爹哋至鍾意嗰間！
李八方
mailto:[email protected]