前年佔領運動期間「暗角七警」事件嘅主角、公民黨曾健超，因為被指襲擊11名警員及抗拒4名警員執行職務而被控。案件噚日喺裁判法院進行預審，社民連梁國雄（圖）到場聲援，更突然變身攝影師，攞住部Nikon D7200相機不停影，姿勢十足，同專業攝記有得揮。
八方問過長毛，佢話助理唔記得帶相機，所以就帶部機畀助理，順便玩兩手，仲讚部相機好靚；佢見在場記者拍緊曾健超，咪影番啲記者玩吓，笑言記者若想要番佢嘅作品，好樂意提供。佢話以前都有玩過攝影，但近年因為視力唔太好，所以一段時間冇掂咯，強調都識得影相嘅一般原理㗎！