版權條例昨繼續拉布戰，立法會主席曾鈺成日前提出加開會議，建議3月2日至4日都要開會，建制派普遍支持，民建聯葉國謙仲話由於3月初係北京兩會會期，身兼人大、政協嘅建制派決定押後上京，聲言遲開兩會一定有損失，但會「盡議員職責」喎！
獨立議員黃毓民噚日提休會待續動議時，針對呢樣嘢寸爆建制議員，「原來佢哋都知道，過去咁多年3月唔出席立法會會議而跑去北京，係冇保持立法會運作！」又話呢班議員成日話有一國先有兩制，今次竟冇大冇細缺席兩會，「勸」佢哋冇必要為689犧牲！但既然建制派清楚表態要留港盡議員責任，毓民就叫佢哋出年唔該繼續留港開會！
八方都提提大家，2011年19個建制派議員因為出席兩會冇開立法會，令臨時撥款史無前例被否決，當時財經事務及庫務局局長陳家強個O嘴樣，成為經典。