筱靖07年參加亞洲小姐入行，在亞視工作8年，去年成功取得香港身份證，達成她在亞視的最終目標，身份證多了「三粒星」，成為真正的香港人，筱靖笑不攏嘴說：「做到香港人，好開心呀！」
亞視的免費電視牌照於今年4月1日屆滿，身為舊將的筱靖雖跟亞視不歡而散，她依然懷念昔日的點滴，更不時鼓勵在「途」的亞視之友，說：「人生有好多路行，唔好當亞視結束同終結，或者可以行出更加多嘅路。」但是，眼前所見，亞視可能只是一條末路。
撰文：楊潔雯
筱靖投資過百萬的德國餐廳於本月中開幕，當日有不少亞視前藝人撐場，她笑笑口說：「開幕之後，發覺原來我人緣都唔差，起碼至少我都有啲信心喺香港繼續打滾，舊年仲諗住攞完身份證就走，哈哈哈！」
亞視生涯當過渡期
提起一張「三粒星」的香港永久性居民身份證，筱靖開心都不得之了，她在亞視工作了漫長的8年，歷盡艱辛都是為了這「三粒星」，亦是以青春換取得來最大的成果，她笑說：「點講呢？亞視對於我來講，好似一個……我講踏腳石好似好衰咁，衰得滯，即係好似一個過渡，其實每一個人都要一步一步行，行樓梯咁行上去另一個層次咁，我覺得亞視係一個曾經，喺嗰度有好多開心同唔開心嘅回憶，到今時今日見到舊同事我都會鼓勵佢哋。」
她續說：「我呢度開張開幕，好多師姐佢哋來支持我，起碼至少我呢7、8年冇白行，見到亞視仍然在職嘅同事都會鼓勵，但係當然人生有好多路行，唔好當亞視結束同終結，或者可以行出更加多嘅路，我見到威仔（蔡國威）最近都可以做DJ，佢都有另外一方面嘅發展，肥哥哥（劉錫賢）同潔儀姐姐（袁潔儀）都有騷，嚟緊下個禮拜一齊合作去內地做騷，都唔至於係冇前途冇前景，亞視都係一個平台，唔好放到佢咁大，冇意思嘛！」
多分耕耘一點收穫
如今筱靖扎根香港，她勉勵一班亞視之友說：「我覺得係一步一蓮花，一步一生花咁行上來，大家都係山底咁一路行，我嘅起步線仲要比你哋低㖭！我當初入去亞姐冇名次，我係一個普通打工仔，我都係一路咁行，其實各方努力，唔好話個人好與唔好，唔講呢啲嘢，每一個人嘅努力係睇得到，尤其係藝人唔係一分耕耘一分收穫，可能係好多分耕耘係得一點收穫，咁所以我不停咁樣鼓勵佢哋。」
場地：Schnee German Restaurant（銅鑼灣）
生意之道：素食者賣豬手冇難度
有家底又嗜好多的筱靖，愛做幕前，又喜歡搞生意，最近更踏足餐飲業，開德國餐廳，最抵死是筱靖其實是一個素食者，她說：「係呀！好多朋友話我，你食素㗎喎！喺度賣豬手，因為我哋嘅廚都好犀利，我哋除咗主攻啲德國菜，佢哋對西班牙、意大利菜都好熟，仲會研究啲素菜式畀我食。點解我會有興趣投資佢哋呢？我第一次去佢哋第一間舖頭食飯嘅時候，佢一次過煮咗8個素菜畀我哋食，係每一個唔同嘅款式同味道，好有心思，原來可以做到咁，我先至有興趣，之後都會去考察，因為我呢度新開張裝飾可以再執吓，嚟緊我會去德國專搵啲特色裝飾，之後都會再開分店，香港有好多食肆，香港、九龍、新界有會方便啲，啲人懶得過海，𠵱家兩間都喺香港呢邊，所以我都有必要喺九龍都有。」
