維園年宵下星期開幕喇。公民黨今年搵到個唔錯位置，就係近住糖街入口嘅42號檔，仲改名叫「公民檔」。黨魁梁家傑、副主席Tanya陳淑莊、議員毛孟靜同青年公民主席鄭達鴻，昨為大家介紹產品，包括印有「香港人」標語嘅電腦布袋（$98）、記事簿（$38）、tote bag（$88）同咖啡杯（$88），傑哥最愛嗰隻咖啡杯，被毛姨姨笑佢幾十歲人扮偽文青。
毛姨姨同Tanya最鍾意驅狼龍蝦鉗（$108），產品名說明一切，唔知第一家庭會唔會幫襯？Tanya稱同黨友余德寶拍咗條示範點樣煮「一地兩鉗屈水魚」嘅短片上網。其實個鉗可以化身暖手枕、咕𠱸、坐墊等，傑哥話每項產品都係得幾百件，好賣就會加價，即係「超支」喎。