索羅斯發表中國硬着陸的言論之後，中國即刻透過官媒作出多次反擊，反映中國其實好擔心一眾國際炒家對中國嘅狙擊會升級。
索羅斯開得口公開唱淡，好可能係因為暫時睇淡中國嘅市場力量仲未夠強，並且想大家幫手一齊沽落去，不過，索羅斯狙擊同唱淡，亦都唔代表中國一定會被沽爆。話說索羅斯早於2010年已經唱淡歐元兌美元會見一算，不過，隔咗六年之後，歐央行又減息又負存款利率，就連量寬都做埋，但直到今時今日歐元都仲未掂到一算。
前輩教落「物先腐而後蟲生」嘅道理，意思指一件物品冇腐爛的話，昆蟲係無法喺上面寄生，大鱷狙擊其實都係同一個道理。歐元區雖然有歐債危機，但索羅斯幾年前嗌沽歐元之時，仲未衰到要解體嘅地步。
歐元區未衰到爛
到後來歐央行終於諗到各式手段頂住先，拖延危機爆發嘅時間，所以歐元區到家陣都未死得住。歐元區未衰到腐爛嘅地步，索羅斯同一眾大鱷自然搵唔到位寄生，因此就算佢點唱淡，歐元兌美元都沽唔落一算水平。
講返中國，大陸成日強調家陣只係處於經濟轉型過程，所以增長先會放緩，不過佢嘅問題又邊止咁少。
轉型帶來嘅陣痛只係頭盤，信貸問題先係主菜，內地嘅地方債同企業違約問題經已曝光，只會隨住經濟放緩而繼續惡化。筆者認為，除非中國好似歐元區咁，可以諗到計將問題拖延，例如係地方債置換呢類手段，否則就算索羅斯唔出聲，中國都一樣會爆發危機。
El.
本欄逢周二、五刊出