【死因分析】
旺角先達廣場手機店雲集，但隨住自由行褪色，iPhone又炒唔起，昔日月賺廿萬的風光不再。去年底實施的《競爭條例》更加是雪上加霜。有手機店小老闆坦言，目前生意大跌八成，月月蝕錢，已兩個月齋交租，無糧出。
連鎖店大打減價戰
《競爭條例》上月生效後，豐澤、蘇寧及百老匯等多間連鎖電器店，同時將Sony及三星手機大幅劈價，部份手機更較建議零售價低兩至三成。當時有業內人士估計，連鎖店趁新例出台大打減價戰搶生意，加上大公司本身容易與銀行合作推信用卡分期及折扣，預期會嚴重影響小商戶生意，並會爆發倒閉潮，新例生效後反而更壟斷。
當日預言，今日應驗，在先達賣手機三年的小老闆坦言，自從自由行褪色後，營業額每況愈下，去年9月iPhone 6s又炒唔起，，先達已變死城，根本冇人行，目前營業額比9月時大跌八成。舖位去年11月續租，月租由3萬元減到2.5萬元，減幅17%，「你搵到錢，個5,000蚊唔係錢，你搵唔到錢，減5,000蚊都冇幫助。」
他無奈道：「𠵱家營業額只是夠交租，自己份糧都賺唔到，每個月都蝕錢，家陣都係咬老本㗎咋！」據了解，以賣iPhone為例，高峯期每賣1部賺近900元，保守推算1個月賺近20萬元。但現時賣1部iPhone僅賺100元。他不諱言：「競爭法實施後，大型連銷店銷售手機唔使跟公價，佢哋攞貨多，減價又勁過我哋，根本就以大欺小，競爭法變相踩死我哋啲小商戶。」