周二因為內地票據交易冰封令資金突然緊絀，拖累A股急插，噚日先跌後回穩。雖然銀行之間驚票據變報紙，但只需人行講句話包底，令票據變番票據，要打通票據市場交易，其實唔難，希望呢單嘢同A股跌勢暫成過去。不過長遠就係個新炸彈，因為你唔知幾多係「真．票據」，可大可小。
呢排有好多中國計時炸彈等住爆，但H指急跌至市賬率0.8倍，已賭緊一半機會中國爆煲。幸好，有越多炸彈，反而令中共官員識驚，習派又好、團派又好，管好個銀包先再鬥過。你見習近平同李克強開始口徑一致講去產能，可能係內鬥暫時紓緩嘅現象，呢個利好因素肯定未反映喺中港股之上，而市場對於各種壞消息就有一定準備，加上小弟身邊個個睇淡，冇理由跌市撈底後只有自己輸，冇其他人陪輸咁古怪，相反理論下，小弟繼續比其他人睇好啲。
小弟明白唔少人買中資股好難過到自己嗰關，咁嘅話，買惠理（806）感覺可能良好啲，理由亦有五個，第一，大市槓桿股，升市肯定受惠；第二，波幅夠大，現價有支持；第三，管理層執行能力點都好過未來三年盲目傾斜於內地嘅港交所（388），有能力吸引到原本買開港交所嘅投資者；第四，唔係身處中國金融體系風眼位置，內地爆煲間公司都唔會渣都冇；第五，受惠中港基金互認。結論係，現價買！
晉佳
https://www.facebook.com/advanceguy1/