雖然話本港零售市道轉差，但早兩年租落舖要開張嘅零售商戶都係要繼續去馬嘅，好似瑞典時裝品牌H&M位於旺角家樂坊嘅九龍旗艦店，就將於本周五早上10點正式開張。
華華噚晚經過H&M呢間店，發現已拆晒圍板，仲燈火通明，外牆大型燈箱都亮起晒，就快開張，裏面應該已經佈置得八八九九喇啩。公關方面就話，周五簡單開業，冇特別儀式。
家樂坊業主係恒隆地產（101），公司前年落實將個場地庫至1樓共3層租畀H&M，舊年年中交場畀對方裝修，場內所有小店一個月內就被清走，聞說月租900萬元，一年租金逾1億元，H&M之前已經幫恒隆租落銅鑼灣恒隆中心4層做全球旗艦店，並已開業，成件事入面，恒隆老闆陳啟宗應該最開心喇。