巴塞隆拿嘅「MSN」三叉戟真係勁到飛起，美斯、蘇亞雷斯加尼馬呢個組合真係擺喺足球歷史上，都話唔定係第一。不過，再強嘅球員都可能受傷，亦冇可能踢足咁多場，佢哋都需要後備，就好似最近傳聞巴塞想喺夏天免簽費蘭度托利斯(圖)嚟做MSN嘅後備。
家陣MSN嘅後備係蒙尼亞艾哈達迪同辛度拉美利斯兩位青訓小將，講真佢兩位都唔係好夠班，如果巴塞可以搵到位有番咁上下級數同經驗、又願意打後備嘅前鋒嚟，就更加完美。費托其實唔錯，首先佢經驗豐富，可以教吓啲年輕人，同埋佢係西班牙人，既習慣做後備，嚟緊又約滿，真係啱晒，但小弟覺得巴塞冇咁易簽到，因為馬體會呢個夏天肯定出盡力留人。國際足協禁咗馬體會喺未來兩個轉會窗買人，雖然有報道指施蒙尼唔打算同費托簽新約，但馬體會正值用人之際，其實好有機會留住佢多一年。
除咗費托，巴塞可以考慮吓上半季喺切爾達踢到曉飛嘅洛尼圖，今季15場入八球同有五次助攻，紅過一排，最近佢傷咗先少咗人提。洛尼圖29歲，相信都希望趁機會簽到張大合同，同埋佢以前喺巴塞B隊都踢過三年，相信幾熟悉巴塞嘅風格，可以好快融入球隊體系。除咗西甲內部，巴塞仲可以放眼其他聯賽，例如法甲嘅巴黎聖日耳門。小弟唔係叫巴塞簽番伊巴謙莫域。雖然如果有伊巴做後備就真係屈晒機，但小弟相信佢就算34歲都唔肯坐後備。小弟想講嘅係阿根廷前鋒拿維斯，佢已經30歲，都算係國家隊嘅常規輪換球員，加埋佢夏天就約滿，如果巴塞簽到佢返嚟都幾抵用。
文：咖喱