每逢有新股上市，公司都鍾意送產品畀投資者或傳媒作為紀念品，有啲紀念品都幾特別，好似舊年有內衣公司送出桃紅色靚bra，有環保公司又送空氣清新機，收到只能O嘴講句多謝晒。
今日開始招股嘅好孩子中國（6186）主要喺內地做嬰孩產品零售業務，公司專登訂製咗一批成人用嘅羊毛圍巾，送畀一班投資者與傳媒，管理層仲話呢批圍巾喺市面上冇得賣，至於價錢方面幾多，佢哋就話，送禮講心唔講金喎。
咁啱香港最近天氣凍，呢份紀念品的確係幾實用，不過咁，呢條圍巾正正方方，比起平時用嘅方形絲巾仲要細條，又由於比較滑手，好難穩陣咁披喺肩膊上，成年人似乎好難用到，畀BB用可能啱啲。話晒公司做開嬰孩用品，特製產品都係啱BB嘅。