有錢唔通真係大晒？我求大俠唔認為係，但喺強國人眼中一定係囉。據英國嘅《衞報》報道，有一間中國企業同意贊助葡萄牙第二級別聯賽即係葡甲（圖），但就開出一個相當離譜嘅條件，就係要求各間球會畀中國球員踢正選，而且數目都唔少，每輪聯賽必須要有10個中國球員係正選上陣；而咁都未算，呢間中國企業仲霸道到指派咗三名助教，去部份葡甲球會工作，諗住用錢嚟控制整個葡甲。消息指，葡萄牙球員工會強烈反對呢間中國企業咁無理嘅要求，認為唔根據球員狀態或強項等因素去揀正選，而係根據贊助商嘅要求，係屬於違法行為。至於葡甲聯賽亦表明咗自己嘅立場，表示接受贊助商提出嘅中國球員去葡甲比賽嘅計劃，以及畀各間球會自行決定係咪同意接受呢批中國球員，但係就講明，冇義務一定要畀佢哋落場，踢正選就更加唔使講。