高路普一嚟到就幫利物浦入英聯盃決賽！利物浦前晚喺英聯盃四強次回合，主場輸畀史篤城0:1，加時後踢成1:1，好彩憑米洛列特喺互射12碼神救兩球，最終贏6:5，率先晉身下月28號喺溫布萊舉行嘅決賽。
史篤城靠越位波追和
利物浦首回合由佐敦伊比奠勝作客贏史篤城1:0，周二返到主場踢次回合諗住易踢啲，點知完半場前就畀阿拿奧杜域射入而落後0:1，兩回合打成1:1；但從電視重播所見，阿拿奧杜域入波前明顯越位成兩個身位。法定時間打和1:1，加時又冇入波，結果要互射12碼。頭五輪史篤城同利物浦喺第二輪分別有高治同安利簡恩射失，打和4:4，進入突然死亡階段；去到第七輪，米洛列特撲出蒙沙尼嘅12碼，祖阿倫就射入，最後利物浦12碼贏6:5，總比數以7:6殺入決賽。
射到第七輪先分勝負，真係好刺激，不過高路普就話自己睇唔到。呢個身高1米93嘅德國領隊表示：「通常我都會睇，但前排球迷話我太高阻住佢哋視線，我膝頭又有事唔可以踎喺場邊，於是坐喺後備席睇唔到囉。」話時話，利記17次喺具競賽意義賽事射贏咗14次，果然係12碼專家。
「紅軍卡富」踢足105分鐘
高路普又大讚養傷20個月後首次打正選嘅「紅軍卡富」法拿根：「法拿根係我嘅MOTM（最佳球員）。佢對上一次打正選係2014年五月，今仗佢打咗105分鐘，實在令人難以置信，真係好勁。」對於救咗兩球12碼嘅米洛列特同射致勝12碼嘅祖阿倫，佢咁講：「我哋決定咗頭五輪邊個射，但深信祖阿倫要有份射；結果佢亦幫我哋奠勝。另外，我真係一球12碼都睇唔到，不過米洛列特真係好出色。」提到有冇信心贏英聯盃，高路普就話：「我哋去溫布萊係要贏波，輸波好無癮㗎。」
今次係高路普執教生涯連續五季帶領球隊打入盃賽決賽，但之前四次只係攞到一冠，希望佢可以順利贏到喺利物浦首個錦標啦，同埋幫紅軍贏到自2012年後首個冠軍。
